內地富豪呢幾年入侵香港馬圈，佢哋有數之不盡嘅銀紙買貴價馬，有啲的確幾成功，好似潘蘇通一對「事事為王」及「大運財」，都成為大賽常客，其中打吡及香港盃盟主「事事為王」，更已退役轉做種馬，開拓新財路。仲有魏宇及劉賀，以往馬圈聽都未聽過，但佢哋第一次做馬主，愛駒「和順超影」就嚇你一驚，初出贏馬姿態比晨操更容易，被喻為「灰色神獸」。
不過唔係個個內地馬主都咁好運，好似趙勇咁，佢係香港馬會北京會所所在地嘅業主，身家又係數以百億計，幾年前喺香港拍賣會，以歷史紀錄價900萬投得「北京金寶」，諗住大展拳腳啦，點知隻馬未跑過已退役，錢銀事小面子事大；慘痛經歷後，趙勇隔咗幾年，上季先捲土重來，用420萬又投得「金龍」，慶幸呢匹馬健康好得多，上季已經力操，但一直唔跑，無非等今季三歲更成熟，更有把握一出即勝先上陣。「金龍」母線有唔少具級際賽實力嘅早熟短途快馬，「金龍」本身試閘亦好純熟，一啲都唔急躁，今期初試啼聲，排外檔跑直路賽啱晒，即管睇吓趙勇有冇入錯貨！