究竟係八字唔夾，定係魔咒？堂堂歐國盃金靴，韋拿幫墨爾本城踢咗3場澳職，3場都贏唔到，噚日嗰場仲要喺墨爾本打吡大敗，被墨爾本勝利炒5:2，唔通韋拿要抱憾離開澳洲？最新消息話，韋拿仲會踢埋31號對阿德萊德聯先走，希望佢臨走可以幫墨爾本城開到齋啦。
貝利沙戴帽搶風頭
頭兩場澳職對FC悉尼同埋紐卡素噴射機，韋拿都有入波，但條防線唔爭氣，墨爾本城兩場都踢成1:1。韋拿喺賽前講到明，最希望喺澳職贏番場波先走，「入到兩球，我已經好開心，我𠵱家只望贏到一場波。」點知上星期六對墨爾本勝利，墨爾本城唔單止贏唔到，仲要輸鑊甘！墨爾本城原本有個好開始，由後衞維拿特開紀錄，雖然勝利靠艾奇湯臣追平，但積臣荷夫曼喺26分鐘再幫墨爾本城領先2:1。儘管兩個入波都唔關韋拿事，但見到班隊友爭氣，終於識入波，相信佢都好開心。
不過，韋拿今場狀態一般，有時畀波大力過頭踢出界，有時走位就快得滯，跌入越位陷阱。相反，對面勝利嘅射手貝利沙就「弗」到漏，風頭勁過韋拿，佢今場連入3球，加埋艾奇湯臣入多粒，結果勝利以5:2反勝墨爾本城。見到自己隊波由領先變落後，落後變大敗，韋拿賽後都好冇癮，球證一吹哨子完場，佢就嗱嗱臨返入更衣室。
唔忿氣 踢多場先離「城」
早兩日嘅報道話，韋拿將會提早結束借用期，離開墨爾本城，返去紐約城幫手做宣傳同埋商業活動，但最新消息指出，韋拿會踢埋嚟緊星期五對阿德萊德聯先走。堂堂歐洲頂級射手，上季仲幫馬德里體育會拎西甲冠軍，竟然踢咗3場澳職都贏唔到！如果我求大俠係韋拿，肯定嬲到爆！另外，有報道指墨爾本城已經搵好韋拿接班人，就係澳洲前鋒約舒亞堅尼地，但佢同名古屋鯨魚份約年底先屆滿，佢最快都要喺出年1月先加盟到。
識睇，一定係睇足英台【英波Live】：
http://soccer.appledaily.com
http://bit.ly/engballlive