周日英超大戰曼聯主場迎戰車路士，紅魔在領隊雲高爾堆砌眾多球星下，戰績雖稍有改善，但整體演出仍然未達一線勁旅水準；即使車路士鬧前鋒荒，火力之強仍力足在奧脫福球場全取3分而回，紅魔鬥藍戰士，平手盤捧車路士。（球賽編號：星期日47；now621台明日0:00am直播）
紅魔入埋唔夠輸
曼聯在今季由名帥雲高爾領軍下，得到球會財力上全力支持，目前陣容已是相當星光熠熠，不過戰績卻只屬一般，至今僅取得3場勝仗。紅魔中前場有法卡奧與迪馬利亞等球員，到上周聯賽作客西布朗，已連續5仗能夠攻入對手至少兩球。
不過強大火力背後防守卻依然欠穩，上仗作客西布朗兩度落後下終以2:2驚險逼和對手，近4場英超共失掉9球之多。前鋒朗尼在今仗仍要停賽，中場路爾斯華倫西亞與守將莊尼伊雲斯皆受傷缺陣，老將卡域克則有望復出。
榜首車路士是今季英超餘下唯一一支不敗之師，經過8輪聯賽後僅失兩分。大戰前夕，車路士最令人關注是鋒線情況，迪亞高哥斯達（DC）近期受傷病困擾，雷米則肯定倦勤。主帥摩連奴表示，DC仍有機會在今仗復出；不過車路士中場後上進攻能力強勁，摩帥排陣不乏好牌選擇，就算DC倦勤，球隊火力依然不減。
車仔冇DC都唔驚
車路士過去一周兩場比賽，在該西班牙中鋒缺陣下，仍能先後擊敗水晶宮與馬里博爾，兩仗合共取得8球。舒賀爾尼病癒可候命，加上有夏薩特、奧斯卡杜斯山度士與法比加斯等入球能力出眾的中場在陣，要攻破脆弱的曼聯防線仍然不是難事。上場聯賽領紅的艾斯派古達要停賽，右閘位置將由菲臘路爾斯頂上。
曼聯後防不濟，就算車路士的DC最終未能趕及披甲，紅魔勝算依然不大，平手盤自然要撐榜首。
文：何西
識睇，一定係睇足英台【英波Live】：
http://soccer.appledaily.com
http://bit.ly/engballlive