國師陳雲成日喺鍵盤指點江山，但佢啲策略一時一樣、前後矛盾，連佢班高登擁躉都要用「有食藥」同「冇食藥」分開，唔係跟車太貼就出事！最新一單係國師突然由死守旺角、變成叫人退出旺角，又話要靠習近平解局，最令佔領人士火滾係，國師將佔領失敗推晒畀學聯、學民！
話明要「整死」雙學
國師一向話要勇武守旺角，突然用一句做事要「能收也能放」，下令「放開旺角」，仲話咁「事情就出奇蹟」，真係同武俠小說一樣咁曲折離奇。唔單止咁，國師解構佢套邏輯，仲賴學聯同港府對話之後，唔夠膽解散金鐘，旺角佔領區隨之得以保存，所以「我們（即係國師自己）將解散的主動權放在金鐘，放在泛民+學聯的身上，將政治責任退回給他們，等他們攬炸彈」，即係話明要「整死」雙學，佔領人士有乜理由唔火滾！
不過最神係，國師話佔領運動可以拖得一段時間，除非北京拋出改善普選方案，否則短期內難以解散，亦難有血腥鎮壓，後續發展就要視乎習總，因為「習近平主席用香港拖延下來的時間解決權力鬥爭和香港事務的權力交接」，有泛民中人同八方講笑，話呢段說話若然由何俊仁、李卓人講，「實俾人話投共、密室談判、仲唔俾國師作法五雷轟頂咩！」