運行了大約兩個月的歐洲主流聯賽，終見各地真強隊開始還原惡氣；碰巧下周中歐洲無重要戰事，戰意不用懷疑。今輪重心再追作客韋斯咸的「藍月亮」曼城，客軍摩打已撻着，國內等閒之輩不易偷雞，博入球「大」及2.22倍[-1]「客勝」，望復前失。
周中歐聯第3輪分組賽大放熱氣，強隊延續近期勁勢，不乏大屠殺場面。兩大歐洲班霸德甲拜仁及西甲皇馬，近3仗全勝，分別驚人地共攻入17及13球；巴塞隆拿，今屆重視防守，同期亦每仗俱至少淨勝兩球。明天要作客硬撼曼聯的英超1哥車路士，3連捷入10球失1球。至於2哥曼城，雖然歐聯未開齋，但在聯賽走勢相當強勁，逼和車仔士氣倍增，錄3連勝兼每戰必開[-1]。勢頭已變，同強隊作對冇着數。
曼城周中作客到天寒地冷的莫斯科「吉場」，被中央陸軍逼和2:2；上、下半場表現判若兩隊，假到不似真，投注中伏者不少。主帥比歷連尼今季鬥強隊多出阿古路踢單箭頭；但鬥弱旅則排4-4-2，讓射術超班的阿古路（圖），在前線有更大活動空間。
上周聯賽鬥熱刺，自世界盃傷後再度撻着入球摩打的阿古路踢單箭頭，恰死對手高大笨拙中堅卡保奧，勇演大四喜；這位今季9球全是「網仔波」的英超入球王（正保持平均每108分鐘入1球紀錄），雖然當中6球是踢單箭頭取得，但作客到今季攻強守弱的韋斯咸，主隊兩閘艾雲加斯威爾及贊堅臣卡士稍低，曼城可用4-4-2，多側擊強攻，反壓對手，料今場入球不會少。
串維拉冷W好分
英超入球「大」暫時冠絕4大聯賽，比率逾58%，較德甲還高，「韋曼」兩軍屬性主攻，博曼城[-1]外，1.52倍入球「大」穩開。一頭一尾，筆者今周冷門心水在下周一獨腳戲，維拉「讓球」下盤兼冷W。續主場出戰的昆士柏出現內訌，領隊哈利列納與中場好手泰拉拔公開罵戰；上仗臨尾香負利物浦，見防守全無紀律，不論用李察鄧尼或里奧費迪南，中路也守不穩，「老納」教波技止此矣。信維拉是冷殺手，大敗予愛華頓未失捧場信心，喜見主力中堅華亞爾已復出，望箭頭賓迪基狀態續進，再施穩守突擊，受讓平/半取下盤及3倍冷W，信心不低。
兩場心水的開賽時間，相隔兩天多，但足智彩晚晚開盤數十場，要笑到最後，定力大考驗。
波神
神級攻略 智破足彩
識睇，一定係睇足英台【英波Live】：
http://soccer.appledaily.com
http://bit.ly/engballlive