隨住北京要搞「秋後算賬」，越嚟越多針對佔中「老屈」材料出籠，最近有泛民中人喺網上睇到幾份所謂佔中會議紀錄，但圍內人睇完，真係笑到肚痛，認為「作料」人好唔專業，竟然出現「阿爸係女人、阿媽係男人」嘅錯誤，好似其中一段話：「『人民力量』在旺角佔領區擁有重要影響力，應讓梁國雄議員加入核心決策層」，明明長毛係社民連主席，「人力喺旺角有影響力，唔搵大嚿、老蕭，走去搵個社民連主席加入，有冇搞錯！」
另一個仲好笑，話黃毓民同泛民、李卓人開會，話發動「熱血公民」在旺角搞事，該泛民更加笑到出唔到聲，「係人去過佔領區都知，當泛民遇到毓民，只會互X，根本冇可能開會，早排工黨郭紹傑先同毓民喺金鐘大炒一鑊，李卓人點會同毓民開會」。