八方自細住喺獅子山下，見到獅子山之巔掛出「我要真普選」巨型banner，真係十分驚喜，激動到熱淚盈眶，好多香港人亦俾呢個新獅子山精神感動，八方更加要多謝一班「香港蜘蛛仔」，佢哋花咁多工夫、冒險去懸崖峭壁掛banner，值得全香港人畀like佢哋。
可惜呢幅驚世banner、歷史性傑作，傲視香港一日之後，就俾當局派人空降拆走，不過正如「蜘蛛仔」講，香港人要求真普選永不言敗，政府可以拆走banner，甚至秋後算賬去檢控「蜘蛛仔」，但係大家屋企窗門、晾衫架、T恤、帳篷，甚至額頭，都可以掛起或貼上「我要真普選」五隻大字，處處都可以係獅子山，甚至人人心中都有座獅子山，《蘋果》即時做嘢，今日隨報附送8.5吋x35吋大「我要真普選」海報（圖），畀大家表態，聽日仲會隨報附送「我要真普選」貼紙，獅子山下，真普選遍地開花。