上星期熱熱哋推介曼城「大」，副領隊第2日見到我，笑笑口舉起姆指，仲話未完半場已經收錢，之後可以輕輕鬆鬆睇埋場波。早幾日上波總開會，佢又寫紙仔問功課，我話條路順咗就唔好停，今晚睇中英超早場韋斯咸主場對曼城（圖）嚟多次「大」，雖然得1.52倍，少係少咗啲，但如果將上期1.57倍叠落去就變2.38倍。
玩大細，耐性同定力都直接決定成敗，韋斯咸今年開季有咁好成績點會冇理由，經過8周排第4位，你估咁易，射手迪亞法沙高過去5仗入5球，平均嚟講拍得住對方王牌射手阿古路。仲有，韋斯咸喺過去3場比賽錄得50次射門，真係驚人；韋斯咸如果要證明自己有能力排前列，呢場真係好大考驗，又睇吓兩隊咁猛火力嘅球隊，點樣演入球騷喇！
講番開會嗰單嘢又有笑料，話說超聯轉播權兩間免費台爭到天昏地暗，結果大家都知良心台以250萬元直播20場投得轉播權，而為咗報答各會支持，仲開出任何球隊只要加4萬就可以播多1場，一經公佈，反應好到不得了。
好似開頭唔多撐佢哋嘅少林寺為例，佢哋即刻加碼，直播晒佢哋所有主場比賽，計起上嚟比嗰3間出48萬嘅大會仲抵好多，最搞笑係會上竟然有人話，不如叫啲細份球隊補番啲差價就公平啲，副領隊聽完即刻忍唔住笑咗出嚟，跟住細細聲同我講，佢話：「聰明人蠢完一次仲唔夠嘅！」死未！
本地職業領隊
耳聽八方 專收好料
識睇，一定係睇足英台【英波Live】：
http://soccer.appledaily.com
http://bit.ly/engballlive