曾俊華在十月二十日講及政府將研究會否有措施協助佔領區內受影響之運輸、餐飲、零售、酒店業，左丁山期期以為不可，交得起舖頭月租350萬元嘅鐘錶珠寶店要政府協助？金鐘區之五星豪華酒店要政府協助？千祈唔好講笑，政府錢唔係咁用嘅。
與此同時，曾俊華嘅上司梁振英更加惹火。十月二十日晚，唔知係唔係特首辦新聞統籌專員嘅獻計，梁振英在禮賓府見少數外國傳媒講佔中及普選，向外國媒體統戰，點知外媒通訊員一啲都唔客氣，如實報導，在紐約時報、金融時報見報後，左丁山睇完唔覺驚奇，但工會領袖，基層代表如陳婉嫻、李卓人等睇完，相信唔怒火中燒就假，唐英年在競選時講過：「你呃人」，陳婉嫻等被呃得慘咯，李卓人係特首敵人，俾特首砌，已經視作等閒，但嫻姐呢？左派工會大阿姐叫出口號就係為工人爭福利，實際行動要聽阿爺講，堅定不移地支持梁振英政府，一定要做CY政治盟友，咁就唯有打甩門牙和血吞，頂多背後垂淚嘅唧。
梁振英在競選時好話說盡，又話幫工人，又話研究標準工時（所以陳婉嫻成日話追佢找數），但十月二十日對西方傳媒講得好明白：「提名委員會嘅廣泛代表性唔係講數字（numeric representation），如果完全係一個數字遊戲，就要顧及香港有一半人口嘅每月收入低於1,800美元（約14,000港元，相等於入息中位數），咁你嘅政策與政治就要考慮埋佢地。」講到咁白，即係話如果香港有真普選，廢除功能組別嘅話，恐怕香港嘅窮人就會主宰香港政治，到時要實施民粹政策，大派福利，而香港必須要維穩，令企業精英對香港營運有信心。哦哦，咁又搞乜鬼最低工資呀？研究乜鬼標準工時呀？講乜嘢MPF改革呀？張建宗不如收檔啦。陳婉嫻真可憐，一味乞求梁振英俾面推標準工時，原來梁振英講得透澈：沒有真普選，就是要抵抗窮人之政治要求。伊朗式普選，就可以保證當選嘅特首大權在握，派唔派糖由佢話晒事。左丁山要求真普選，又同時反對民粹福利政策，兩者並不互相矛盾，印尼普選出嚟總統維多多一上台就話要考慮增加燃料價格，就係一個例子。