前特首、全國政協副主席董建華係狼英知心盟友兼伯樂，八方唔係董伯肚入面條蟲，都可以好肯定咁講。不過董伯同狼英幾親密都好，噚日董伯講到狼英好勤力服務港人，竟然同狼英唔對嘴，最大鑊係董伯話見完狼英無耐，不禁令人懷疑係董伯搞錯日與夜，唔記得一日其實只有24而非48小時，定狼英連董伯都呃？
話說董伯噚日會見傳媒，一講到狼英點樣盡心盡力、冷靜理性應對佔領運動，就話狼英家陣一日做足24小時，而且有中央高度信任，即係話狼英冇功勞都有辛勞。
自爆5秒內瞓得着
不過有政圈好事之徒向八方大叫咪住！立即拎部手機係咁㩒上網，畀佢搵翻今個星期一，狼英接受彭博社訪問，當時佢親口對外國勢力傳媒話，就算街外大把人叫佢辭職，佢瞓得同平時一樣咁好，仲好得戚話一上床就5秒內冇晒知覺熟睡，狼英仲話近排瞓得時間少，仲間唔中要小睡補償，認真識嘆。
若然狼英冇講大話，佢一日瞓覺時間起碼有7、8個鐘，咁董伯話狼英一日做足24小時，又從何說起？
係人都知董伯出名做嘢7-11（朝7晚11），一係佢老人家「以己度人」，以為狼英同佢講做足全日，就好似佢咁做到7-11都冇得休息，仲要日以繼夜，令人以為狼英一日有48小時用，可以做足24小時仲有得瞓覺；一係就係狼英嘅語言偽術連董伯都唔放過，同董伯講自己做足24小時，令知心盟友兼伯樂當眾出醜。
李八方
mailto:[email protected]