【壹週刊】喺獅子山掛「我要真普選」橫額，大家係咪覺得好堅揪呢！從事廣告嘅Maxwell，官仔骨骨，唔識爬山，不過就畫咗呢幅圖，隔空聲援佢哋喇！「今朝突然見到呢件事，覺得好犀利，覺得要跟貼啲，所以畫咗呢張圖出嚟，覺得佢哋好有勇氣！」
【壹週刊】男 神岑敖暉、周永康，黃之鋒，TVB刪旁白，榴槤乜乜乜，劉江華，梁振英，相信大家對這些人那些事都好熟悉架喇，不過一班小朋友就可能唔多清楚喇，基於呢 點，Maxwell就萌生開呢個fan page嘅念頭，三日已累積接近四萬個Likes。「小朋友需要資訊去了解呢件事，但家長總唔能夠攞TVB嘅暴力鏡頭去講解，所以想做啲素材俾家長。我相 信小朋友都想知點解每日四點鐘，都有個男人阻住佢睇卡通片！」
同樣係想小朋友對事件有多啲了解，不過幼稚園老師Miss Chun，就因為喺金鐘同細路仔上公民課而被投訴。Maxwell亦有畫圖聲援，「佢做嘅嘢冇錯，不過用咗自己嘅觀點，咁樣可能引起部分反對人士嘅反感。 所以我盡量喺創作嘅時候都會中性啲，唔加自己意見，等家長可以用番自己嘅觀點，解釋俾小朋友聽，不過我絕對支持嗰位老師！」
雨傘運動踏入第26日，政府寸步不讓，但Maxwell就話過程先係最重要。「好大部分人都知最終結果可能未如所願，但喺過程中改變咗好多嘢，做到政治覺醒，呢個比完全實現到嘅結果更重要。」
iPhone版下載： http://goo.gl/1SDaWF
Android版下載： http://goo.gl/xfQS8D
壹週Plus網頁
http://nextplus.nextmedia.com/