西班牙國家打吡，可能係全歐洲最矚目嘅打吡，因為呢場波唔單止代表兩支球隊嘅鬥爭，仲係代表民族、政權同歷史嘅仇恨。皇馬同巴塞嘅仇恨源自一個人，就係上世紀嘅西班牙獨裁者佛朗哥。
佛朗哥係個右翼主義者，在位期間打壓加泰隆尼亞人。佢深深意識到足球對政治嘅影響力，所以禁止球場出現任何加泰隆尼亞旗幟，所有球會都只可用西班牙文嘅名，避免足球成為造反基地。同時，佛朗哥扶植皇馬，打造呢支首都球隊做佢代表；而巴塞就係加泰隆尼亞、反極權、反佛朗哥嘅代表。
喺呢種情況下，球場上嘅勝負不但代表球會嘅成敗，仲意味住佛朗哥對加泰隆尼亞嘅極權控制，同埋加泰隆尼亞對佛朗哥嘅仇恨；要知道佛朗哥在任期間殺咗好多加泰人。
為咗幫皇馬搞掂巴塞，佛朗哥無所不用其極，歷史上亦流傳過唔少故事，可能大家都會聽過。喺1943年嘅西盃準決賽，巴塞首回合贏3:0，之後政府派人威脅巴塞球員，結果佢哋次回合以1:11大敗。仲有個最經典嘅故仔，皇馬當年簽到迪史堤芬奴都係靠佛朗哥幫手；因為係巴塞最先睇中迪史堤芬奴嘅，但佛朗哥運用政治影響力逼巴塞讓人。
世上冇無緣無故嘅恨，皇馬、巴塞呢對球壇首屈一指嘅宿敵，怨恨就係嚟自政治同血一般嘅歷史。
文：咖喱