2003年香港小姐亞軍楊洛婷（Rabee'a）是加拿大華僑，因為操流利英語，混血兒的外表，被無綫監製認定不適合香港電視市場，同屆港姐先後跟無綫簽經理人合約，惟獨Rabee'a不被看好，一直維持普通藝員合約，潛藏至05年把握機會主持明珠台《講生活．講享受》一舉成名，雖然曾被譽為節目的象徵人物，最後都是慘被流放，跟無綫分手收場。
撰文：楊潔雯
性格開朗的楊洛婷強烈反對慘被無綫飛起的說法，她強調跟無綫是和平分手，她邊笑邊說：「我要強調我哋係和平分手，因為都合作咗咁多年，每年都會傾約嘅，好多人都講，人生有幾多個十年，𠵱家藝員合約都簽咗十年，頭一年港姐合約，而我做一個節目已經做到咁成功，不如我又試吓其他發展，可能公司都覺得可以完美咁完結呢份約，That's why有呢個新聞爆咗出嚟。」
花半年準備節目
成名作《講生活．講享受》（Dolce Vita）一做9年，不捨難免，Rabee'a說：「呢個係我自己嘅BB嚟，係我一手湊大，我冇sad，係有啲唔捨得，個節目花咗好多時間，由未出街嗰時，已經要做好多資料搜集，自己去搵客戶，拍佢哋啲products，自己去搵餐廳，要同監製同埋所有人一齊開會，呢啲早期工作都花咗半年時間，我好有成功感，一直咁做落去，有多咗人認識個節目，認識我楊洛婷，所以呢個節目令我有少少唔捨得，個節目咁成功，大家一講到《講生活．講享受》，都會諗起我，我都心滿意足，做到呢個節目嘅icon。」
為了做好個節目，Rabee'a花了很多時間在聯絡工作上，這也為她在MC界發展鋪路，Rabee'a說：「因為個節目令我識到好多客戶同PR朋友，可以畀我有機會出去為其他公司做MC，記得第一次接MC嗰時都好緊張，當時乜嘢都唔識，唔知着乜嘢衫，唔知要追人攞稿，唔知要了解吓公司做乜嘢，之後成年都冇人搵我做，後來我就學識，當有人畀機會時就要好努力做功課，了解佢哋公司嘅歷史背景，然後先會表現得更好，其實每個人嘅努力係會喺表現度睇到嘅，所以呢幾年來工作，只係有增無減。」
成品牌專用司儀
近年Rabee'a在司儀界嶄露頭角，更成為各大品牌的專用司儀，她掩掩嘴將聲線提高8度說：「一級嘅司儀，好開心喎！我都唔敢擔當，我有好多前輩都好欣賞，唔會諗到自己去到一級司儀咁犀利，只係想做好自己本份，做一啲自己喜愛嘅品牌，就更加開心，同埋會做得更加好。」
髮型：Zap Tang
場地提供：稻（日本）餐廳
【三個粉絲去首爾】
追星實錄，即上韓劇讀: http://hk.apple.appledaily.com/kstar