奧斯卡影后妮歌潔曼（Nicole Kidman）﹑金像男星摩根費曼（Morgan Freeman）﹑「美國隊長」基斯伊雲斯（Chris Evans）﹑Kenny G﹑謝茜嘉艾芭（Jessica Alba）﹑前少女時代成員Jessica等，昨日到達海南島觀瀾，出席明天「觀瀾湖世界明星賽」，認真星光熠熠﹗
Jessica「被退出」後單拖出席活動，見佢悉心打扮，雖然神情略為緊張，但笑容滿面，而助手事先講明「不提感情﹑不提舊公司﹑不提少時」，而Jessica影相時擺晒甫士，表現合作，更以一口流俐英文對答。
講到活動星光熠熠，問佢最期待見到邊位巨星？Jessica：「每個都想見到，好仰慕及尊敬，好似Nicole Kidman，Jessica Alba。」佢又興奮提及個人品牌事業，問到鍾意唱歌定拍戲？就話歡迎每一個機會，又謂現時有好多工作傾緊，自己好期待。
再問佢有傳會同「另一半」K先生結婚？Jessica邊笑邊擰頭。經記者再三追問，佢先開腔：「冇，唔係真嘅，冇計劃結婚，不過（結婚）都係每個女仔夢想，我將來都想結婚。」咁係咪想同K先生發展更親密關係？此時助手即時擋駕。
另外，有傳Jessica會搬往香港住？Jessica就話唔係，冇計劃搬去邊，但係好愛香港，好鍾意旅行，鍾意周圍去。