好多人周轉唔靈都會去「二叔公」到典當啲值錢嘢，最普通當然係金、鑽、名錶，不過原來呢期都興當手機喎！「二叔公」靄華押業（1319）主席陳啟豪就話，至今收到十幾部容量128GB嘅iPhone6，典當價就係4,000蚊，足足比官方價7,188元低一截。
根據「當押商條例」，當舖會開張以貸出日期起計4個農曆月內嘅當票畀典當人，如果典當人喺到期日都未拎錢同埋當票去贖返件抵押品，當舖就可以將件抵押品充公並變賣。值得一提嘅係，原來典當借錢係收月息，簡單去講，未夠1個月都要畀足1個月嘅利息，而且利息最高可以去到48厘。
華華真係對呢班窮到要典當iPhone6嘅「果迷」深表同情，咁難得先抽到部iPhone6，竟然要拎去「舉」，點解唔考慮trade咗佢呢？𠵱家冇乜人吼嘅灰色機，按網上資料，回收價都有7,600蚊㗎！