facebook（fb）行政總裁朱克伯格果然識做，為𠱁美籍華裔女友Priscilla，早於2010年開始學普通話，前年娶得美人歸。佢之前唔聲唔聲，都冇乜人知佢識講普通話，周三喺北京清華大學接受訪問時就首度「表演」，全程30分鐘用普通話做訪問，雖然好似佢自己形容咁，講得「很糟糕」，但其實大家都聽得明㗎。
朱克伯格係清華大學經濟管理學院顧問委員會，前日到訪清華。佢一開口就一路講普通話，令現場師生大吃一驚。佢笑住講，學普通話，主要係想同太太同埋太太嘅奶奶傾多啲偈，此外就係想學習中國文化。
其實大家都知fb𠵱家入唔到內地，朱克伯格學講普通話，另外一個原因應該都係想為公司鋪路，希望打好關係，他朝有日可以打開缺口，入到內地市場啫。朱克伯格呢日都話，fb啱啱招聘咗20名中國學生，明年會請更多㖭呀。
有消息仲話，朱克伯格稍後會喺北京跟廣告商，同埋想了解市場嘅專業人士會面，佢想打入中國嘅心都昭然若揭。
