晨訊科技（2000）食住智能手機熱賣潮，喺啱啱公佈嘅9月數據，keep住靚仔，加埋開拓潛力勁大嘅物聯網業務，晨訊係等緊大翻身。
晨訊啱啱公佈冇耐，上個月收入1.64億元，比上年同期增加近12%，又今年頭九個月收入達14.8億元，比上年同期，更增加咗近18%。若果拆開獨立第三季嚟睇，呢季收入會keep住喺5億元樓上。晨訊食住祖國智能手機大熱潮，繼今年半年度成功虧轉盈497萬元（上年上半年大出血1.26億元），第三季數據繼續醒神。
PB平絕同行
仲要咁睇，據權威國際數據資訊（IDC）嘅估計，今年全球手機出貨量，會達到12億部，比上年增加20%。參考其他行家所講，祖國智能手機供應商，先計劃喺今年下半年，推出更多4G手機新型號，行頭掂檔，晨訊主打嘅手機及解決方案，同無線通訊模塊瓣數，喺嚟緊嘅第四季，照計亦實食冇黐牙，今年全年成績單止血翻身（上年全年見紅2.4億元）可期。
又晨訊近年開拓物聯網呢瓣項目，集團喺半年成績單講明，呢個瓣數已經進入實質階段。講過係，物聯網規模，係互聯網產業30倍，兼且會形成上萬億元級別嘅通訊業務。今年上半年，晨訊喺物聯網收入700萬元，佔總收入唔夠1%，但要咁睇，晨訊早着先機，加埋呢瓣潛力勁大，晨訊一煲掂，中線係掂過碌蔗。
晨訊現價（0.405元）潛喺八年大底，比起2010年高位兩蚊，大跌咗80%，有靚仔業績支持，真係再跌有譜，家陣係等緊掉頭。買晨訊，當翻半番到0.61元計，PB仲係得0.8倍，比起場內好多隻PB仲係企喺1倍PB樓上嘅手機股，晨訊仲係好平。
錢雋
細價股專家
本欄逢周二、三、五刊出