【2O14亞洲小姐競選之淡妝出事】亞視員工昨日終獲發9月份薪金，認真可喜可賀！不過亞視財困仍未解決，昨日20位候選亞洲小姐在大埔總台為《ATV 2014 亞洲小姐大中華總決賽》排練行catwalk，雖然明知有傳媒採訪，但眾佳麗只淡掃蛾眉，3號吳美婷的深黑熊貓眼、19號邱珈蓉頭髮凌亂、9號韓非兒更束「阿婆髻」，個個似足剛起床未整妝，驚嚇度爆燈。亞視公關經理黃守東直認佳麗要自行化妝及整頭，問是否冇錢？他解釋：「因為今日係普通基本綵排，所以由佢哋自己化淡妝。」
似暗撐佔中
一眾佳麗昨日穿上由大會安排的粉紅Tee，部份衫上有黃色亞姐標誌，驟眼看似撐佔中的黃絲帶，未知是否繼無綫後，被公認是維穩台的亞視內部又作反，黃守東否認說：「唔係，一向都有黃白兩種顏色。」昨日請來Alice B.擔任儀態導師，來自台灣的19號邱珈蓉雖是模特兒出身，但4號陳沛鈺、6號劉佩欣、8號張軼珺和17號寧潔琼上圍凸出，行catwalk時身材盪漾搶盡風頭。而大會亦有安排蛋糕送給前日26歲生日的20號唐淑薇，問生日願望？她說：「希望喺比賽當中攞多啲經驗，覺得自己未來，緊要過攞冠軍。」
亞視助理副總裁趙汝強昨日亦有現身，他透露亞視員工昨日已收到9月份糧，並計劃補回利息；至於10月份糧亦已積極安排中，他說：「已同董事局、股東及投資者傾緊，希望如期出糧。」有指筱靖因講過「出糧天經地義」被亞視雪藏，黃守東否認傳聞，但承認筱靖原本主持的《星動亞洲》會經常轉人。而亞姐總決賽將於下周日晚（26日）於大埔總台錄影，霍震霆、羅霖和冼國林會擔任評判，當晚選出的10位佳麗將於稍後聯同其他亞洲地區佳麗再有一場總決賽，到時三甲才會誕生。
採訪：溫敏芝
攝影：陳俊強
【三個粉絲去首爾】
追星實錄，即上韓劇讀: http://hk.apple.appledaily.com/kstar