華夏醫療（8143）雖然季績勁蝕，但股價則不跌反升，喜其動作多多，最新又同中信醫療健康產業集團達成合作協議，進一步彰顯華夏背景有力之處。近期走勢有量有價，相信好快就會踢上1元大關水平。
華夏本身已係話題多多。首先係身為一隻創業板股份，竟可持主板公司萬嘉集團（401）控股權，其次則係近三年都有錢賺，只不過截至6月止季績，因應商譽安全撇值而轉虧。不過華夏致力擴展，首先於月前以4,742萬元收購珠海九龍醫院，收購市盈率僅7.9倍，遠低於同業收購市盈率20倍，亦令華夏旗下醫院由兩家增至三家。
本周三又有喜訊傳出，華夏同中信醫療健康產業集團訂立策略性合作框架協議，於內地醫療及醫院行業中尋求潛在投資合作機會。公告並冇介紹過中信醫療背景，查實此公司為中信集團旗下規模龐大的醫療集團，家陣國企正積極推行混合改革制，雙方日後若達成合作，唔排除中信醫療會入股華夏，令中信醫療有借殼上市憧憬。
其實，華夏家陣股東背景好有實力，特別係大股東翁國亮於4月將3.43億股可換股優先股賣畀New Hope國際，佔擴股後19.5%，呢個新股東背景亦幾神秘，相信應有後着，令華夏可炒元素更多。
古道祥
本欄逢周五刊出