美股上周三失守16000後，大市似乎跌唔落，道指周三雖然又跌153點，但指數仍處於16400，而喺蘋果為首嘅科企業績帶動下，納指較有生氣。蘋果、facebook及阿里巴巴等行業龍頭，股價都貼近高位，短期可否突破視乎業績因素。見報時，微軟和亞馬遜已公佈業績，下個禮拜三輪到facebook，11月4日嘅阿里巴巴係戲肉。
雖然美股喘穩，但環球經濟隱憂處處，加上伊波拉、地緣政治以至聯儲局退市等不明朗因素，專家睇唔通後市之餘，看法亦有分歧。例如，高盛認為外圍經濟不振只會令美國未來兩年損失0.1個百分點GDP增長，毋須改變樂觀看法。相反，美銀認為假若美股再跌10%，聯儲局可能重新推QE。
歐銀體檢 聚焦資產質素
未來一周，歐美市場各有焦點。聯儲局下周三議息，如無意外將宣佈結束買債行動。歐洲央行本周日將公佈銀行壓力測試結果，以及《資產質素報告》。西班牙傳媒日前引述消息指，起碼有11間歐銀壓力測試肥佬，希臘、意大利、葡萄牙幾隻歐豬都上榜。今次壓力測試準則比較辣，市傳有德國大銀行唔達標，但德國《商報》昨日報料話24間德國銀行全部合格，冇一間需要增資。
有分析指今次肥佬嘅銀行主要屬於歐豬國家，規模相對細小，對歐洲金融市場影響應該有限，但大家對葡萄牙最大銀行Banco Espirito Santo早前爆煲仍記憶猶新，區內銀行業究竟仲有幾多計時炸彈未拆真係天曉得，所以大家都好關注今次體檢結果。
姑勿論壓力測試結果如何，喺衰退及通縮威脅夾擊下，歐元仍有好大壓力。值得留意的是，為推動銀行業放貸促進經濟活動，歐洲央行6月已推出負利率，加上9月再減息，開始有銀行頂唔順，將成本轉嫁畀存戶，令後者存錢不單無息收，而家仲要倒貼。
據《華爾街日報》報道，紐約梅隆銀行上周五開始向歐元大額存戶徵收0.2%費用，而高盛同摩根大通亦有相同舉動，其他歐洲大行據報亦會陸續跟隨。聽聞對沖基金等機構投資者首當其衝，搵緊方法逃避，例如將啲錢調去投資貨幣市場基金等產品。隨着歐央行負利率下趕客的情況浮現，加上預期央行買債行動升級，歐元前景不容樂觀。
事實上，著名對沖基金經理泰珀（David Tepper）近日就預期歐央行放水陸續有來，建議吸納2至3年期歐洲債，並爆響口話正在沽空歐元。歐洲昨日公佈的PMI數據較預期理想，帶動歐元從1.26美元邊緣反彈，本周在1.26至1.28美元範圍上落。不過，正如評級機構標普昨日話齋，歐洲經濟危機未除，相信仍未見底。
奇兵
本欄逢周五刊登