【中環】葉蒨文（沙麗）同林子祥（阿Lam）結婚17年傳過好多次婚變，早年曾經傳出沙麗返美國逗留期間，同羽毛球教練楊尚仁撻着，仲話沙麗同阿Lam婚姻已經名存實亡，而最近就輪到阿Lam有緋聞喇！女主角係同船王包玉剛前女婿、董建華競選辦公室主任鄭維健拍過拖嘅阮麗嘉（Fiona），今個月12日阿Lam 67歲生日去澳門做騷，沙麗全程冇影蹤，反而Fiona就似足跟得夫人，唔單止幫阿Lam打點晒騷前騷後所有嘢，就連Lam媽都照顧周到，全程扶出扶入，據知阿Lam嘅歌迷都覺得佢哋關係唔簡單。
唔肯坐輪椅
前晚約7點半，記者喺中環置地廣場撞到沙麗帶媽咪出街食飯，同行男士等沙麗媽咪落車，立即準備好一張輪椅，不過沙麗媽咪見到記者就唔敢坐，面露尷尬之情，沙麗則笑住叫記者唔好影相，話媽咪好怕見到相機，成程都唔見阿Lam現身。日前阿Lam兒子林德信出席記者會，俾記者追問父親同Fiona、沙麗關係，林德信答案係「一切如常」，仲解釋話沙麗缺席父親生日會，因為要照顧自己母親。
採訪、攝影：潘冠恩
【三個粉絲去首爾】
追星實錄，即上韓劇讀: http://hk.apple.appledaily.com/kstar