近排藍光大片不斷上架，嚟到呢個禮拜先叫靜番啲啲。身為標準宅男嘅龍叔叔，其實影碟只算得上係第二嗜好，game碟先係no. 1，以前用百幾粒鐘打到100% clear攞白金盃都係等閒事。撞啱恐怖大作《The Evil Within》新鮮出爐，衝住《生化危機》之父三上真司個牌頭，點都要寫番個玩後報告，當係哈囉喂應吓節都好吖。
當年《生化危機4》變成動作取向嘅恐怖game之後，無錯係走出新方向，而且機迷都好受落，不過龍叔叔始終懷念1至3集周圍搵鎖匙開門解謎嘅玩法，而且新嘅《生化危機》已經冇咗恐怖驚慄氣氛，當知道三上真司脫離Capcom，自組公司出隻《The Evil Within》，的確令全球機迷引頸以待，希望重拾當年不停被嚇嘅剌激感。
動作怪怪哋 設定夠離奇
好喇，由開機、入碟、啟動遊戲、熄燈同扭大喇叭，龍叔叔充滿住興奮緊張嘅心情。點知睇完opening個心已經涼咗一截，畫面冇預期嘅一級水準，人物表情同動作輸晒畀《Uncharted》同《inFamous》，莫講話打擊感差，就連行路都有啲怪怪哋。唔緊要，好玩刺激先係主菜。第一章講主角俾人捉咗去一間類似屠房嘅密室，四圍掛滿屍體，一地都係內臟同血，仲有個肥佬不停喺度斬啲斷肢，畫面相當血腥同嚇人。主角要鬼鬼崇祟咁搵路逃走，緊張氣氛營造得唔錯，不過劇情講到肥佬隨後追殺主角，要不停匿喺類似醫院病房嘅衣櫃同床下底，乜咁似《Silent Hill》嘅？
跟住劇情又話主角被發現，要不停奔走逃命，可惜畫面上下都有大黑邊（可能受機能所限），視野嚴重受阻，加上畫面只以30fps顯示，急速轉換視覺嗰陣，會有頭暈惡心嘅感覺，搵路走佬相當辛苦。最離奇係明明俾肥佬把電鋸「片」咗一嘢，跛跛吓咁逃亡，搭完電梯又會神奇地冇事，跑走廊逃出大廈時仲快過劉易斯。
冇乜神髓 死法夠多
去到第二章，進入荒野場景，四周有零散喪屍駐守，可以走近以體技暗殺，有點《生化危機 4》嘅影子。唔暗殺，都可以用物件或雜音聲東擊西，慢慢搵路去目的地過關，龍叔叔又不禁諗起2013年得獎大作《The Last of Us》。從好多細微位，都睇到隻game向好多經典致敬，可惜偏偏冇咗昔日《生化危機》嘅神髓，而且畫面冇驚喜，動作亦差，一啲都睇唔到三上真司嘅神采，可能新公司規模不如Capcom，又要一口氣推出PS、XBOX同PC幾大平台，程式編寫同畫面上難以兼顧，令到遊戲流於二三線嘅水平。
要讚嘅地方真係冇乜，勉強可以讚嘅係死法夠多，鋸死、夾死、咬死等。而且遊戲設計唔貼近現實，極易死亡重來，滿足到需要發洩嘅機迷。外國論壇話隻game係「倒吃甘蔗」，玩到十章打後會刺激好多。龍叔叔只打到第四章，已經冇乜動力再玩落去，呢碌甘蔗都係擺番落盒封印算數。
龍叔叔最愛嘅三大恐怖game系列，《生化危機》已淪為動作game，《零》又只出喺任天堂度，剩番一隻《Silent Hill》，都俾美國製作團隊搞死埋，好彩小島秀夫接手新一集《Silent Hill》，玩過PS4外傳體驗版《P.T.》，就知乜叫真正嚇鬼，叠埋心水等呢隻好過啦。
龍叔叔
簡介：幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
