一班金融服務界代表噚日收市後果然拉隊去灣仔警察總部撐警。現場所見，立法會議員張華峰，同金利豐（1031）老闆娘朱李月華等等，共百幾人分批去到。證券學會會長李細燕讀完聲明，就將兩個大果籃、鮮花、慰問卡等等交畀警察代表。至於有傳聞話佢哋原本有計劃送張支票畀警察福利基金，呢日就唔見影。
細燕姐話，好理解學生嘅民主理念，𠵱家係時候回歸合法、理智嘅討論，希望學生早日重返校園云云。作為金融業代表，佢梗係話，擔心佔中會嚇走外國投資者，影響香港嘅國際金融中心地位喇，又估計影響要幾個月後先至浮現。
其實政治爭拗一日都嫌長，幾個月後大家都唔知道發生乜事喇，話唔定到時滬港通開晒車，大家掛住炒股，又乜事都忘記了。