今個星期我有一個非常難忘嘅經歷，因為受到某運動品牌嘅邀請，可以參加佢哋嘅5星級史丹福橋球場之旅，喺佢哋嘅VIP房入面，現場欣賞到我人生第一場歐聯賽事！呢次旅程嘅另一個得着，就係對一支世界級球隊嘅運作，有更深入了解。
整個旅程嘅第一個亮點，就係去咗車路士訓練場。由於係比賽前夕，所以可以睇到球隊練習、摩連奴點樣去指導球員，「特別的人」的確好有魅力，令一班球星都肯放下身段聽佢支笛，難怪球隊有好成績啦。至於今季重返車仔嘅杜奧巴，雖然已經36歲，但係射波嘅時候仍然好勁，每腳都好似想射爛條楣咁樣；呢個星期迪亞高哥斯達同雷米未必出得，「巴哥」都係時候發威喇！
訪藍軍驚見摩帥專櫃
球隊要有成績，除咗有好教練、好球員之外，幕後團隊都好緊要。好似我參觀咗車路士嘅球鞋房，每個球員都有一個專用櫃，放置唔同鞋釘嘅波砵，令球員無論應付咩賽事、場地都可以發揮出最高水平。最令我印象深刻嘅，就係球員應對傳媒嘅流暢度。今次我有機會同菲臘路爾斯、艾斯派古達傾偈，發覺佢哋答題技巧都唔錯，雖然同摩佬比起上嚟仲有些少差距，但係都好得體，相信車路士嘅幕後團隊，花咗唔少心力喺球員嘅「形象工程」上面。
我身為和富大埔嘅推廣人員，當然要睇埋車仔點做推廣工作，順便取經！史丹福橋球場入面有間兩層高嘅megastore，由內衣到球衣、廚具到汽車擺設，差唔多講得出嘅都有得賣。更特別嘅地方，就係有一個專賣摩帥紀念品嘅櫃位，而其他球員係冇嘅！「特別的人」果然夠晒特別，港超球會未來要成功，單係設計紀念品，已經可以大動腦筋！
車路士球隊實力當然唔使懷疑，睇住佢哋大炒馬里博爾6:0，感覺好似個個球員都未去盡咁，可能因為要留力對曼聯啦！車仔今季個個球員都狀態大勇，攻守亦夠平均，對住攻強守弱加上朗尼停賽嘅曼聯，贏波絕對唔係問題。呢場波相信會係一場大比數嘅比賽，車路士有機會贏4:2！
LULU
不懂踢波愛睇波