佔領運動至今有三個星期以上，香港的經濟損失有多大，誰也說不準，對香港本地生產總值貢獻份量最大的外貿業、金融業，及政府三大項目，顯然沒受影響，星展銀行董事總經理張建生在十月二十日之香港亞洲經貿論壇接受記者訪問，都話星展銀行業務如常；貿發局研究總監關家明話出入口正常；我地見到，政府公務員日日繼續支薪，政府基建項目正全力開工，當然不受佔領運動所影響，市面上嘈得緊要嘅主要係本港交通行業（小巴、的士、巴士）、零售、酒店及飲食業。根據星展銀行首席經濟師柯大任（David Carbon）在上述論壇談及嘅香港GDP細明表，本地貿易（零售包括在內），酒店食肆兩大項只佔GDP共9%，加埋物流業，共佔15%，但物流業GDP以航運為主，本地交通所佔份額唔係多，任建制派人士點計，佔領運動對今年香港嘅GDP增長嘅負面影響甚微。
以上係從宏觀方面睇。從微觀、個別行業睇，餐飲、運輸、酒店、零售業在銅鑼灣、旺角、金鐘，當然會口出怨言，但呢樣嘢係做生意嘅風險之一，頂多係黑天鵝效果一類，當其衝者唯有自嘆運滯。財政司司長曾俊華喺十月二十日突然對記者講：「政府將會研究會否有措施協助個別影響行業」（即佔領地區內之行業，主要係上述四類），咁就未免多餘，搵嘢嚟做，左丁山老友餐廳R、餐飲L三個星期來講起生意就牙痛咁聲，呻到樹葉落，但左丁山並不以為政府有責任幫佢地，一講到協助，就要動用公帑，特區政府有乜理由要在此時刻派糖俾生意人呀？呢啲直情係corporate welfare（企業福利），左丁山反對亂派社會福利，更反對派企業福利，用納稅人嘅錢嚟協助生意人賺錢或降低做生意風險，只會將貧富懸殊，財富分配不均呢個大問題變得更嚴重，容易激起民憤！旺角區大量年青人在星期五六日參加佔領運動，視為周末生活一部份，連外國媒體「華爾街日報」都觀察得到，青年人參加佔領，有反貧富懸殊嘅理由，反樓價過高嘅理由。梁振英在十月二十日黃昏接受外媒記者訪問，亦提到呢一點，既然如此，曾俊華提及「研究會否有措施協助個別受影響行業」，就非常政治敏感啦！
（代郵：老友鄭大班來電通知，佢位公子就讀嘅美國聖母大學University of Notre Dame，全美排行第十六名，與Brown及Vanderbilt相同，高於加州大學柏克萊（第20名），該大學高層包括常務副校長、文學院長等今日下午五時在置地廣場香港銀行家會所開大中華獎學金通佈會，歡迎廣大教師、學生家長、校友參加。知名人士如該校校友鄭維健、鄭維志，中大校長沈祖堯，港大高層會出席。）