抗戰已經27日，胡椒噴霧、催淚彈、警棍、藍絲帶、黑社會、禁制令，都動搖唔到同學嘅信念，因為佢哋追求民主同自由，唔想未來社會喺被欽點、被代表下生活。周六西甲國家打吡，皇家馬德里主場對巴塞隆拿，又係兩大當代球王基斯坦奴朗拿度鬥美斯嘅好戲。
由2008年起，足球員每年最高榮譽嘅金球獎（連同前身國際足協世界足球先生），得獎者唔係美斯就係C朗；以兩人西甲開季勢頭，似乎今年仍然係兩人之爭。不過，歐洲足協會長柏天尼就發表「欽點」言論：「原則上，世盃冠軍成員理應贏得金球獎，所以今年應該由德國人奪得。」
先唔講金球獎由國際足協各成員國嘅國家隊教練、隊長，加埋具資歷足球傳媒投票產生，柏天尼就算位高權重，都冇份投票。4年前國際足協亦已經教過大家，世盃冠軍成員未必拎到金球獎，當年美斯就力壓恩尼斯達同沙維捧得首屆金球獎。
小弟唔係睇唔起德國，事實上佢哋肯定係當今世界最具實力、最全面嘅國家隊；但正因為太全面，人才太多，要我揀一個最獨當一面嘅球員拎金球獎，似乎揀唔落手。隊長拿姆？入球王湯馬士梅拿？定係金球英雄馬里奧葛斯？呢個3揀1，真係好難袋住先。
既然金球獎已經做壞過規矩，今年不如又係美斯鬥C朗囉！首循環國家打吡，兩個爭取印象分啦！
文：牽牛