隔牆有耳：影靚獅山banner
先行幾百級樓梯 - 李八方

「我要真普選」巨型banner高掛獅子山之巔，標誌香港人以獅子山精神爭取緊民主。要記住呢個歷史畫面，各位龍友非龍友，不妨參考吓《蘋果》攝影同事心得。
體力要求低、器材要求極高嘅獅子山下選擇：攝記馬泉崇噚日喺新蒲崗彩頤花園嗰頭影獅子頭，佢話要用800mm焦距鏡頭先影到，日頭光線充足時影先至夠sharp，但支鏡絕對唔平，非一般人選擇。至於獅子山中段選擇，攝記大佬鄭逸宇帶隊由樂富獅子山公園行樓梯上到山腰，大約半個鐘，再出動不時出現喺金鐘佔領區嘅航拍機飛上山拍攝，呢段路適宜中度體力又要求高器材嘅龍友。而獅子山上則適合體力要求高、器材要求低嘅市民。攝記羅君豪及江俊豪由獅子山公園上到獅子頭影，花成粒鐘兼行幾百級樓梯同山路。佢哋話上面唔危險，連手機都影到，一張相可影埋banner加樓景，但嗰度唔係好對正banner，要等有風吹佢過來先得。
八方話點影都唔及習總咁威，唔使行已經到山之巔，居高臨下撐傘挺普選。