政府𠵱家大力發展緊東九龍同黃竹坑做新商業區，連一向鍾意投資物業嘅賭王四太梁安琪嘅投資口味都同步轉型，繼今年7月斥資32億元，向超人李嘉誠旗下長實（001）買入黃竹坑建築中嘅寫字樓之後，上月底又出擊，再拎4.85億元買入觀塘同得仕大廈。
四太一向鍾意買樓投資保值，最為人津津樂道，係佢2004年趁樓市旺勢，先後豪擲合共10億元掃入尖沙嘴君臨天下、凱旋門、西灣河嘉亨灣同埋土瓜灣翔龍灣等多個新盤單位。佢又買落唔少甲級寫字樓、甚至旺區舖，好似中環擺花街壹號廣場，佢亦有舖在手。
可能佢乜都買過，今年就轉買二線地區嘅寫字樓同工廈。繼黃竹坑寫字樓之後，根據最新土地註冊處資料，一間叫興瑋企業嘅公司9月26日（佔中啟動前）以4.85億買入同得仕大廈。興瑋董事蘇合成正正就係四太嘅御用物業買手。
壓價兩成買同得仕大廈
同得仕呢幢工廈，原本由同得仕（518）持有，年頭開始叫價6億元放售，結果被四太鋤價近兩成成交。除咗可以活化改裝收租，呢幢工廈亦有重建價值。
講番四太轉買工廈，華華估計，可能因為𠵱家買親新樓又要抽籤又要排隊，好難再大手掃貨，搞到四太都好少玩新盤。至於核心區寫字樓、舖位，之前越叫越高價，回報率太低，唔係咁值博，推使四太轉玩二、三線區嘅物業。話唔定，四太下次會考慮入標投埋官地發展，實行做埋發展商。
李華華
mailto:[email protected]