大家細個嗰陣應該記得有套電視劇集叫「天師執位」，主角有苗僑偉（即大家叫嘅三哥）同已故可人兒翁美玲，仲有無咗佢唔成事嘅劉丹大爺，Prof J真係覺得係好經典，雖然以前嘅特技同而家無得比，但故事實在真係無得頂，而校長嘅金曲「誰可改變」，就係呢套劇嘅主題曲。30年嘅金曲，幾時聽係都咁好聽，校長好嘢！
妖氣充斥好難避
識唔識捉妖？Prof J肯定就唔識，不過，自從互聯互通之後，真係成個股票市場多咗好多隻妖股，妖者，即係邪，好似偶像陳百強花名叫小妖，不過大家見到佢，點會妖妖聲！哈！相反，妖股升嘅時候，無人覺得有問題。
其中近期經典肯定係中國天然氣（931）！有個股市肥龍同我講，話佢個客喺9毫子買咗1,000萬股，高位3元唔走，佢話剩係乜鬼協議簽咗都咁，落實咗咪犀飛利，點知股價暫時不似預期，都賺咗1,000萬元！話時話，喺大跌嗰日，成交量有成140億元，Prof J嗰日見到佢一招蜻蜓點100日線，就技術性反彈，真係你有你掟佢，佢又繼續妖俾你睇，哈！哈！真係吹脹！
考究嘅唔在於呢隻股，而係當妖氣充斥市場嘅時候，你見到妖股嘅機會真係越嚟越高，即係點避都避唔到，如果大家唔善忘，其實騰騰曾幾何時都俾人話係科網既妖股。只不過人總喜歡鍾情泡沫嘅感覺，無記得時刻清醒嘅意念，係唔係！
之前本欄亦有講過，喺八字頭嘅股份，同樣一個道理，重點在於你嘅出入位，如果只係識媽媽聲罵隻妖股，但又日日見佢係咁升，你又日日係咁揼，不如更加努力，同Prof J一樣，做個專劈妖股嘅捉妖專家好過，係唔係？一錘定音出發！
徐燦傑
齊魯國際控股首席策略總監
本欄逢周四刊出