佔領運動差不多進入一個月，查實大孖沙對「佔中」取態係點？上月董伯伯吹雞，本地一線富豪就北上乖乖面聖領旨，仲點會有人對「佔中」說三道四？即使是對佔領行動取態溫和的李嘉誠，上星期都焗住出聲明表個態，叫學生返屋企啦。
不過一名在四大家族企業打工的高層（姑且叫他做P先生）就報料，其實不少富豪及生意人嘴裏說反佔中，心底卻是不反對（當然亦說不上支持，最多是neutral）。真係㗎，點解嘅？我問。P先生笑了兩秒才緩緩地說：「你又唔係唔知有幾多人唔鍾意CY，好多人都想睇吓佢苦惱」。
大孖沙都做花生友！但是CY煩，他們又唔使煩生意？「計過數，即使佔領區店舖關半年唔做生意，仲有其他區的連鎖店，對大孖沙嚟講濕濕碎，絕對頂得住。小商戶就可能慘啲」。
有人就話，香港「立立亂」影響營商環境、外資信心乜乜乜。年過五十的P先生說：「經濟周期有上有落有幾奇。畢菲特都講過啦，Only when the tide goes out do you discover who's been swimming naked（潮退先知邊個無着泳褲），大孖沙個個又點止着一條褲」。噢，呢句好似有弦外之音喎。
何淑茵
mailto:[email protected]