報載中國已成立一個中國賽馬會，由中國賽馬管理委員會與中國賽馬執行委員會組成，究竟呢兩個會是否重叠，現時唔清楚，相信一定係官方機構啦，因為據稱中國賽馬管理委員會係由各國家部委嘅代表組成嘅嘛，他日賽馬收益會撥歸國家財政，知名慈善機構與賽馬產業喎，明年七月在上海、十月在北京就會舉辦第一屆國際賽馬會。
二十年來，中國不斷傳出會搞賽馬，次次都係狼來了，武漢、南京、廣州有官商合作興建賽馬場等批准，結果都係蝕到眼光光，呢次突然間傳出在北京上海辦賽馬，左丁山有啲意想不到。講到賽馬，今年係香港馬會130年紀念，但上海早在1850年已有馬場，戰前跑馬比香港更蓬勃，不過時移世易，今日上海拍馬都追唔上香港，一年之內，點可以舉辦到大型賽馬活動呀？左丁山唔係幾信啫。內地城市興建馬場跑道、看台一定會快過香港，但賽馬活動要包含好多管理軟件，由馬房、練馬師、騎師、博彩方式與博彩管理、電腦軟件、馬主人數與品格、監控賽馬、獸醫、化學檢驗室以至馬迷文化、評馬人、評馬傳媒（馬經）等等，都需要一段時間，起碼十年八載先至可以成形，過程中要搵師傅指導，內地話要搵英國及歐盟嘅賽馬機構合作喎，正是捨近圖遠，搵香港馬會就會減少溝通麻煩啦，唔通上海刻意要與香港競爭，故意唔睬香港馬會？
賽馬事業若管理不善，好易成為貪腐溫床、成為拉馬做馬行賄收水嘅好地方，習近平打貪喎，正在雷厲風行之際，何故中央會批准賽馬？諗唔通。中國練馬師、騎師從何而來？一年內就可以訓練好？又諗唔通。至於養馬人士（馬主），中國一定不缺，橫掂中國有咁多富豪使一千幾百萬元人民幣買馬，視作等閒事，本港名駒「事事為王」「大運財」嘅馬主潘蘇通咪係內地富豪囉，最近一出即勝千四米嘅「和順超影」，贏得恐怖（指全程以晨操方式都輕易取勝），係好貴嘅馬，馬主又係內地人，呢啲內地富豪鍾意在香港賽馬還是內地賽馬呢，相信仍以香港為優先，但在內地一定奉命捧場。比較受影響嘅會係香港馬主，澳紐日馬如果俾強國人馬主搶購，馬價會高到完全不合理，唯有捱打。