趙頌茹（阿Yu）早排慘遭家暴兼俾分居老公周永恒（Roy）背叛，精神受創，搞到個人瘦到成條柴咁。發憤自強嘅阿Yu，近排好活躍，噚日佢同迪子、HunterZ等一班歌手喺柴灣出席一個同雲端科技有關嘅短片創作比賽活動，阿Yu話都有用雲端監控屋企情況，主要係睇住兩個囡囡，萬一發現有唔妥，可以即刻打電話返去。
「大女搵爸爸」
獨力照顧兩個女嘅阿Yu話：「啱啱湊完大女返學，雖然有啲辛苦，但OK同enjoy嘅，囡囡都習慣校園生活，唔怕陌生人，我都有同老師講留意佢嘅情緒，都驚佢有乜事唔同我講。」囡囡有冇問起爸爸？阿Yu坦白話：「我有話爸爸最近好忙，大女講一次已經明白唔再問，好懂事，我叫佢要乖同聽話，做個開心小朋友；細女亦都好懂事，我煮嘢食時會叫我小心，又問我點解唔開心。」經濟方面有冇壓力？佢就話唔會諗啲唔開心嘅事，有工作會盡力做。另外，同場迪子戴咗黃絲帶現身，佢話前晚睇到5位學生對話，覺得佢哋IQ同EQ都好勁。
撰文：馮仁昭
【三個粉絲去首爾】
追星實錄，即上韓劇讀: http://hk.apple.appledaily.com/kstar