金銀業貿易場理事長張德熙做主席嘅泰加保險早前向聯交所遞交上市申請，呢間本地保險公司專做小巴同埋的士保險，有成37年歷史。公司有咁耐歷史，老闆同管理層當然都有番咁上下年紀。睇公司嘅初部招股文件，六名執行董事嘅年齡加埋有355歲，平均係59歲，即係接近花甲之齡。希望呢間公司上市、吸納大批街外股東後，依然有心有力，仲有長足發展喇。
根據資料，呢間泰加保險早於1977年喺香港註冊成立，股東主要係黎秉良同埋趙新庭，兩位今年都已經分別68同69歲，係最大年紀嘅執行董事。62歲嘅張德熙就喺2010年入股，上市前，佢持有泰加49%股權。泰加就話希望，透過上市集資，增加其他類型嘅汽車保險，兼且開拓新業務。