科技公司開發嘅產品越來越貼身，由手機、智能手錶，甚至係智能隱形眼鏡。你沖涼時尚且要除咗件底衫，但科技公司明顯希望佢哋嘅產品，比你件底衫更貼身，等你同資訊影形不離。
之前菲菲都講過Google Now有幾神通廣大，甚至用恐怖去形容亦不為過。佢會透過你搜索、GPS紀錄、email等，即時提供你需要嘅資訊。例如佢知search過一隊球隊，咁每次隊波一有比賽，就會自動同你報賽果；知你出埠，就會隨時報告滙率。基本上當你想得到某種資訊時，你連search都唔使search，佢就準備好畀你。
不過有時科技太貼心，會帶來唔少麻煩。最近美國有個男人中Google Glass毒，一日玩足18小時，如果冇得用，就會焦躁不安，搞到要睇醫生。科技成癮都講到悶，其實仲有啲會令你發忟憎嘅事。
有個朋友上網搵過一個相機嘅資料，諗住送畀佢老婆，點知佢老婆下次開電腦時，喺Gmail見到呢部相機嘅廣告，就話想買呢部機，朋友呻：「真係乜驚喜都冇晒。」
至於另一個朋友就仲煩啲，佢背住女朋友，經常去大埔某屋苑搵另一個女人。有次佢正印拎咗佢部電話玩，唔小心㩒左個Google Now出嚟，出咗個alert：由所在地去大埔某屋苑車程幾多分鐘。結果正印問：「你成日去呢個屋苑做咩？」
Fifi
http://www.facebook.com/lovefrystock
本欄逢周二、四刊出