各位試過「射波」嘅打工仔都好清楚，做戲要做全套，千祈唔好將「射波」當日吃喝玩樂啲相放上facebook，返工後亦要扮吓喉嚨痛、戴吓口罩，過多一兩日先好喺公司食魚生、煎炸嘢，咁先係一次完美嘅「射波」行動。不過，英格蘭新星史達寧雖然份人工高過我哋呢啲香港打工仔好多，但辦公室智慧就差好遠。佢早排嗌攰，叫英格蘭領隊鶴臣畀佢唞吓，點知第二日即刻走去夜蒲！
上星期日歐國外，英格蘭作客愛沙尼亞，史達寧賽前話今季比賽多，佢好攰，需要唞唞；而鶴臣都順佢意思，擺佢喺後備，下半場先放佢落場，都係踢咗半個鐘左右。史達寧嘅表現賽後已經俾人插到飛起，好在有鶴臣同利物浦領隊羅渣士嘅罵戰分散吓媒體嘅注意力。正當以為件事丟淡咗嘅時候，英國傳媒爆料，原來嗌攰要求休息嘅史達寧返到英國後，上星期一就同阿仙奴中場阿歷士張伯倫同埋前鋒韋碧克一齊夜蒲，仲蒲到半夜3點。
星期日話冇力踢波，但星期一晚竟然有精神蒲到咁夜，史達寧當然又被英國網民批評啦，話佢冇當過入選英格蘭國家隊係一份榮譽，又話𠵱家球壇風氣唔健康，年輕球員太高人工，搞到佢哋過住啲燈紅酒綠嘅生活。
網民撐：佢有壓力
不過，亦有唔少網民都體諒史達寧，仲叫英國傳媒畀啲空間班球員，例如球迷fergo就留言話：「畀啲年輕人唞吓，佢做嘅都係年輕人會做嘅事。大家都知，去玩同踢波係兩回事。唔好怪班英格蘭球星喺國家隊踢唔出水準，因為你哋呢啲球迷畀太大壓力佢哋。」Roscoe亦話：「可能佢去到冇飲酒，只係坐吓，同朋友傾吓偈，等對腳唞吓。」
更有網民順便批評英國傳媒嘩眾取寵，球員踢得好就讚到天花龍鳳離晒譜，做錯少少嘢就被無限放大。而史達寧被踢爆後，佢同經理人暫時未有回應呢件事。
識睇，一定係睇足英台【英波Live】：
http://soccer.appledaily.com
http://bit.ly/engballlive