白鴿黨單仲偕（圖）噚日喺facebook分享一幅性感照，照片中罕見佢着白色背心露出事業線，下身更疑似只着一條白色底褲，令唔少網民睇到嘩嘩聲。單仲偕噚日喺立法會澄清，話自己下身嗰條係白色波褲，着得咁少露晒肉，皆因前晚喺夏慤道紮營時太熱，自己平時喺屋企其實都只會着條孖煙囱通屋走。
貴為IT人嘅單仲偕話呀，平日喺facebook專頁分享相片，一般都只百幾二百個點擊，但呢幅艷照噚日一擺上網，話咁快已有逾1,300個點擊，令佢都相當意外。問佢以後會否改走性感路線呃like？單仲偕笑言：「性咩感吖，都阿伯嚟啦！」佢話平日冇特別健身，唔覺有事業線喎。