【銅鑼灣】鄭希怡（Yumiko）自從嫁咗畀化妝師老公梁學儲（Andy）之後，佢嘅新婚生活一直都好寫意，除咗做吓啲唱片宣傳工作之外，大部份時間都用嚟陪老公。前排見到Yumiko同Andy十指緊扣喺銅鑼灣拍拖，Yumiko好悠閒咁拎住杯果汁，邊行邊飲，行到希慎廣場後面嗰幾間金舖，兩公婆企喺櫥窗度研究啲金器，見到佢哋對啲金牌好似好有興趣，擾攘咗一輪就蹺晒手走人！
勁買護膚品
跟住Yumiko同老公行咗去時代廣場，Yumiko上咗三樓間雪花秀買護膚品，佢喺舖頭試咗一輪，揀揀吓見到俾人影緊相，佢哋都冇理繼續濕平，最後仲拎住一大袋戰利品走人，臨走仲好大方同記者打招呼。之後佢哋去咗皇室堡附近嘅HMV，不過今次佢哋唔係睇吓新碟銷情，反而係研究耳筒，但佢哋同個sales研究咗差唔多15分鐘，結果都係空手而回。
另外，噚日有報道話Yumiko造人成功，不過因為未過安全期，佢只係同身邊幾個閨蜜講呢件喜訊，但係撞正呢期唱片宣傳，為免有所影響，勁愛着高踭鞋嘅Yumiko都改着平底鞋。
採訪、攝影：畢紹基、陳辰
【三個粉絲去首爾】
追星實錄，即上韓劇讀: http://hk.apple.appledaily.com/kstar