由狼英欽點成立嘅「高層次諮詢組織」金融發展局，下星期將會跟埋貿易發展局去歐洲招商，參加名為「邁向亞洲，首選香港」嘅推廣活動。
活動重點係喺10月28日同30日，大會分別喺巴黎同米蘭舉行嘅高峯論壇，主要講人民幣國際化、科技融合、財富管理等題目。
既然有「高層次」嘅金發局參與，當然多金融界猛人出席，當中就梗係唔少得金發局主席查史美倫，仲有金管局總裁陳德霖、港交所（388）主席周松崗。
不過，公關最初畀出嚟嘅資料，港交所嘅代表原本係行政總裁李小加，無端端做乜喺最後關頭放飛機，變成周松崗做代表嘅？
唔通成個「孖屐」都等緊嘅滬港通真係隨時開車，李小加要喺度坐鎮等消息，費事飛去歐洲咁遠？