咩叫職業操守，原來到今時今日都仲有咁多「專業人士」唔明白。喺克羅地亞薩格勒布舉行緊嘅歐洲青年拳擊錦標賽，周一就上演咗場「光明磊落，台上打鑊」，震驚拳壇。主場出戰嘅朗卡（圖），「懷疑」不滿裁判迪蘇阿哥暫停比賽之後突然宣佈對家贏，一怒之下打咗佢一鑊甘。雖然朗卡肚裏面條蟲唔能夠發聲，但有片有真相，鏡頭清楚影到佢首先一槌打到裁判瞓低，然後繼續拳打毫無還擊之力嘅對方，打咗一輪之後先由兩位場邊工作人員拉走。
條現場直擊片喺網上得到瘋傳，好彩克國拳擊協會都冇打算包庇朗卡，佢哋除咗向瞓緊醫院嘅迪蘇阿哥家人致歉，周二仲以「兇殘攻擊官員」罪名，判朗卡終身停賽，以免再俾佢敗壞克國拳擊嘅名聲；與此同時，朗卡亦都被拘留當中。之不過，唔知會唔會有人自發籌旗，幫呢位懷疑因主場輸拳而壓力爆煲，最終鑄成大錯嘅𡃁仔打官司呢？
識睇，一定係睇足英台【英波Live】：
http://soccer.appledaily.com
http://bit.ly/engballlive