40歲Hello Kitty　懷舊賀壽

我們並非Hello Kitty心入面條蟲，加上她無口自己講，咁多年來都無當過佢係人！幾多年？40年！呢位疑似貓的卡通巨星永遠讀小學三年級，所以開生日會大過天，是常識吧。自2005年起一年一度重頭慶典，玩過被綁架、高科技育成等複雜主題，今年Kitty誕換上喜氣洋洋的嘉年華主題，懷舊玩意明顯搶攻一家大細。場內仲有其他Sanrio朋友拱照Kitty姐，真是熱鬧過CCTVB台慶。
記者：葉青霞
攝影：潘志恆

當Sanrio正式宣布Hello Kitty不是貓，是一位住在倫敦的女孩Kitty White，她從不四腳爬爬，是個不折不扣的淑女，永遠在讀小學三年級，還養過白色波斯貓Charmmy Kitty，搞到全球O嘴。除了身世之謎，「白姐姐」令世人驚訝的，還有其已屆40之芳齡！不過她永遠長青，沒有駕馭不了的造型，紅到80歲都唔出奇。40牛一，慶祝活動與紀念展全球遍地開花。香港的Kitty粉絲梗有一個響左近，她多年來都是Sanrio的銷量冠軍，公司超過一半生意靠她供養，香港同慶Kitty誕活動一樣多，與各大品牌聯乘、商場大搞抱抱會後，粉絲最期待的畫面出現了，壓軸的嘉年華有得玩有得影有得買，大家一定滿足。

1.Kitty摩天輪
摩天輪會隨場內音樂旋轉。站在地上的Kitty拿起一束「好友」氣球，甚可愛。

Kitty樂園地圖

2.Sanrio電影
官方首度製作動畫記錄Sanrio小鎮的日與夜，細心看會留意到40位角色穿梭其中。

3.整蘋果批
Kitty媽媽愛整蘋果批，大家要把牛奶、蘋果豆袋拋進烘焙室相應位置，即能贏得爆穀公仔。

4.掟掟小熊
小熊Tiny Chum是Kitty好友，只要把膠圈套進其身便可帶公仔回家。

5.釣釣Kitty
1974年Kitty的首個玩伴正是小金魚。快用釣竿把變晒魚的朋友仔釣上來啦！

6.英雄Kitty
Ichigoman於2012年登場，Kitty以英雄形象示人。遊戲大獎是Kitty黑色斗篷。

用吸管吸走的膠波有可能成為大殺傷力武器，隨時準備用背上籃子收拾高牆外飛過來的波，消滅邪惡吧。

7.懷舊木馬
旋轉木馬上的四個Kitty分別以25、30、35及40周年姿態示人。

Kitty出巡　跳舞任抱抱

踏入上萬呎展館，恍如時光倒流，官方說這是美式嘉年華，共有七個攤位遊戲，未參與過外國勢力搞的嘉年華，但我覺得有兩分似去了荔園。可能由於拋彩虹、擲圈、釣魚等攤位遊戲真的好懷舊好童趣。以往Hello Kitty一年一度的大型遊戲總是要過五關斬六將才完成任務，今次的攤位遊戲就隨意得多，有信心贏才玩都無問題。不過其實有Kitty陪玩，加上有機會得到有錢都未必買得到的獎品，粉絲才不介意多買幾張遊戲券挑戰呢。反正甫進場已給坐在旋轉木馬及在大型摩天輪上的萌爆Kitty迷倒了，謀殺手機記憶體才是正經事。這裏共設六個主題攝影區讓大家影番夠本。「回憶花園」展示各式懷舊文具，讓大家懷緬小學雞時光；還有載滿Sanrio朋友的火車、一幅幅Kitty壁畫等，自拍神器又要出動。
Hello Kitty本人會於周末出巡，我重申，佢真係會出現，仲聲稱會跳跳舞，抱抱大家，粉絲要注意！成日提住佢40歲，但天蠍座的Hello Kitty，正日生日是11月1日，粉絲可入場與她慶祝，仲可獲神秘禮物，大會有特備環節賀誕。Hello Kitty的幕後靈魂人物設計師山口裕子亦將於11月8日來港為粉絲簽名，現號召全港Kitty迷撐場!

入場便可得到牛奶樽設計門票，呼應Kitty於1974年誕生時手持牛奶樽的造型。

Kitty誕生40年

1974年
誕生，由清水優子設計。

1975年
正式命名為Kitty，並推出首件貨品，一個膠製散紙包。

1976年
首度改為站立姿勢。

1982年
成為首個在美國出版圖書的日本卡通人物。

1986年
首次出現證件相look，齋頭無身，頭像更一度成為其logo，印於不同精品上。

1987年
首次出現黑白Hello Kitty產品，主攻青少年市場而非小朋友。

1988年
首套卡通片“Hello Kitty's Fairy Tale Theater”於美國CBS電視台播出，片中的Kitty有口，可以吃東西。

1990年
首個Hello Kitty主題樂園Sanrio Puroland於東京開幕。

1998年
日本地區限定產品初現。由於北海道薰衣草系列銷情極好，其後日本各地都推出限定商品。

1999年
孖公仔男友Dear Daniel誕生。