證監會主席唐家成身兼體育學院主席，噚日佢以體院主席身份出席恒生銀行（011）舉辦嘅優秀運動員獎勵計劃，頒獎金畀仁川亞運得獎運動員，民政事務局局長曾德成都係主禮嘉賓。佢兩位似乎相當老友，頒獎禮前已經坐喺台下不停口密斟，完場亦孖住一齊走。
行到門口，兩人見到大班記者，曾德成喺呢個時候就真係夠晒好兄弟嘞，笑住將唐家成推向記者堆，仲要補多句話：「人哋等緊你呀！」留低唐家成招呼記者，佢自己轉身就走咗去，擺到明費事被人問雨傘運動喇。
唐家成一埋位，以為在場嘅都係體育記者，即刻賣花讚花香，大讚體院有好多設施培訓運動員，運動員表現出色又努力云云。點知記者劈頭就問佢滬港通夠唔夠努力，搞到佢要即刻轉channel！