香港一定贏，劉江華一定要輸。點知，呢次劉華贏咗，但全港市民食花生，一樣冇得輸！話說政府日前同學聯對話，五位官員代表中，兩位只係觀眾，政制及內地事務局副局長劉江華同特首辦主任邱騰華全程零發言，亦因此令佢哋零失言，獲網民大讚「一句廢話都無講」、「完全冇得反駁佢」，榮登「最佳辯論員」！
可惜網民好偏心，只係鍾意熱烈地彈琴熱烈地唱，所以最終只有劉華獲贈大批惡搞圖贈興：除咗變身阿源自嘆「我覺得自己是零」、同步有《Silence》概念大碟推出，主打〈shall we talk〉同〈無聲仿有聲〉，另送〈一生中最愛〉卡拉OK版，以「寧願一生都不說話 都不想講假說話欺騙你」打動人心。高登天后瓊姐仲「流出」劉華同學生絕密講稿，證明劉華點解撼贏林鄭；見到劉華前日6點left咗政改對話WhatsApp group，唔係仲要問點解啩？
李八方
mailto:[email protected]