與周麗淇（Niki）多次合作，總是帶着輕鬆心情拍攝訪問，有講有笑零架子，說真的她像個朋友多過明星，今次再遇依舊親切。Niki生活上追求平淡的幸福，低調的戀情、默默工作，年中演出宮廷劇《衛子夫》意外爆紅，成功打入內地市場，當下的她不着急結婚，工作至上，入行13年的努力，今次一鋪大豐收。
撰文 造型：鄧卓嶽
攝影：周樂恒
化妝：Navi Lam
髮型：Nicole Yip of Hair
喜愛平淡過日子，好像8月35歲生日Niki亦不想刻意慶祝，「對生日真係冇乜特別感覺，𠵱家生日似係為咗啲朋友同屋企人聚吓，冇乜驚喜，我覺得簡簡單單、平平淡淡都係一種好幸福嘅感覺。今年我連fans club party都冇搞，啲fans都有投訴，但係真係太忙未有時間準備。」
低調守護愛
Niki與29歲內地小生男友徐正曦因戲結緣，去年被拍到兩人一同出入Niki貝沙灣香閨後，馬上大方公開姊弟戀情，早前更用揀手機比喻男友，「唔使靚仔，我唔覺得佢靚仔，就好似手機咁，耐用就得。」問到男友可有送上生日禮物，Niki表示不想「些牙」，自己留在心底珍而重之，「好多人問我呢個問題，我都唔係好想答，因為自己知就得喇，只可以講好滿意份禮物，唔係因為價值，而係嗰份心意。」
不止名和利
今年Niki可算大豐收，演出由金牌夫妻檔監製劉家豪和梅小青打造的電視劇《衛子夫》，此劇成為全國收視冠軍，超過10億觀看人次，Niki飾演的平陽公主高貴大器，網民紛紛指她有氣質有演技，而她更與楊冪、劉詩詩等花旦齊名，晉身內地藝人榜頭十位，風頭更蓋過同劇女主角王珞丹。「冇諗過第一次拍歷史正劇就有咁大反應，古裝雖然辛苦啲，但可以試到平時唔會有嘅造型，大家都覺得呢個周麗淇好特別，好似有種上身嘅感覺。不過我又唔想局限淨係行古裝，都想挑戰多啲唔同角色。」
上億觀眾的肯定，意外收穫不止名和利，「開心嘅係內地觀眾好睇演技，同埋內地傳媒報道都係講我嘅工作，好少講到私事，佢哋會攞每場戲嘅對白、眼神比較，描述得好仔細，睇到我好感動，所以嚟緊壓力會更大，希望下部作品會有更多發揮。」
不做低頭族
Niki平日很少流連社交網絡，網上的交流純粹是給朋友與粉絲一個交代，「我打字好慢又唔鍾意玩手機，好似上次冰桶challenge，我捐咗錢但係冇找數，因為當時喺偏遠地方拍戲冇訊息，過晒48個鐘先睇到message。」不做低頭族，卻更愛做書蟲，從《易經》到《三國誌》，越讀越入神。「以前我係讀理科，接咗古裝戲之後發現自己好缺乏歷史知識。至於《易經》一早有睇開，我覺得似一本百科全書，對生活好有幫助。」
練出馬甲線
還記得7月時Niki一個飲品廣告，掀起小背心大晒纖腰，事隔數月，最近Niki於某活動穿上crop top現身，纖腰已經練出馬甲線，「Keep fit養生係對自己嘅一種態度，我以前都唔係好做運動，但係最近鍾意咗高溫瑜伽，可能細個學過跳舞十幾年，對啲柔軟度嘅動作好容易做到。」瑜伽之外，Niki亦不時嘗試新玩意，時下大熱的平板支撐做到全身震，還有spinning單車，「我寧願出街踩會開心啲，最緊要出到一身汗就會好舒服。」
更多精采時尚內容，盡在 http://hk.add.nextmedia.com/。