中三那一年，老師推舉我做學期完結典禮的司儀，我問老師：「都是上台，為甚麼不是給我演出話劇，而是做司儀呢？」那位老師的解釋我這一生都會記得：「做話劇要扮鬼扮馬，做司儀大方得體，大家對你印象會加分！」終於我沒有做司儀，也沒有演話劇，最後還是沒有上過台，而那年我因為成績欠佳膽拖操行品德差劣而趕了出校！可能是這個陰影關係，我是很討厭做司儀的！
作為一個左腦荒廢的人，我根本無辦法記得任何「資訊」，沒有性感的東西，我是不懂去記錄，例如「有請為善最樂，東ＸＸ院Ｘ主席上台為大家致辭……」不要說記下，我望着都冇辦法讀出來，因為我會陷進思考點解Ｘ主席是為善最樂，會否其實背後是偷運軍火？然後再看Ｘ主席個樣，我又會再思考他的命是如何積回來！還有是我看到「芬唇」內的每一環節也想笑，我自問冇本事裝嚴肅叫主禮嘉賓一齊拉動面前好流果碌操縱杆，去啟動嗰個超膠的開幕儀式，除非你准我照以上咁講！所以司儀我一直不只不嚮往，其實直情係討厭！
但世事就是你越討厭的東西，就越揮之不去，到現在仍然不時有人搵我做MC，我已經捱過了「其實點解唔去試吓呢？又唔係義工？有錢搵㗎嘛！」然後做完又好後悔的階段，也捱過好唔好意思咁回覆人：「Sorry！雖然我的簡稱是MC，但我冇乜興趣做MC！」到現在我已經斬釘截鐵回覆：「我是拍電影，不做司儀工作！」但久不久仍有些曾經被我拒絕的路人來電找我問：「對不起！我知你唔做司儀，但個客好鍾意你，好想你做！」，「咁你問過個客我上台講段talk show得唔得？」我未試過有一次會再回覆我「OK！」是否我做司儀原來好笑過我做talk show？如果屬實，咁我都留番自己talk show至做！
雖然我如此絕情，但大家依然對我熱情如昔，無論我點推，仍然有人送上門！
那天我與導演葉偉信一起，又收到有人來電叫我做司儀，我推了幾分鐘至推甩，阿信隨口問我點解推，對住朋友我亦不掩飾：「我唔鍾意做介紹人出場嗰個，我要做被人介紹出場嗰個！」阿信想了片刻：「明白！但你都可以照做㗎，照搵錢㗎！」對別人我會冇興趣回應，但葉偉信肯開聲，就一定有啟發性的言論，所以我順勢就回覆：「咁點照做呢？」，「你咪覆人條件，我做司儀都要人介紹我，你請多個司儀介紹我出場！」以後大家想再搵我做司儀，看看這篇文章就可以，多謝信哥！
【鄒四的夢幻之旅】
撰文：鄒凱光
集編劇、導演、演員、主持於一身的中年漢，有着男人的浪漫。
本欄逢周四刊登
【三個粉絲去首爾】
追星實錄，即上韓劇讀: http://hk.apple.appledaily.com/kstar