Big Four拖累股神畢菲特賬面唔見錢。呢個Big Four唔係四大會計師嘅Big Four，更唔係許志安、梁漢文等四人組成嘅Big Four，而係股神四大投資股份：美國運通、可口可樂、IBM同埋富國銀行。
股神呢四隻愛股啱啱喺呢兩個星期公佈第三季業績，竟然全都差過預期，公佈業績後，即日股價一齊跌，以四隻股嘅即日跌幅，再按巴郡喺呢四隻愛股嘅持股量計算，等於巴郡市值唔見27億美元。
對上一次，呢四間公司公佈業績後，股價齊跌，已經係2012年第三季，當年平均只跌2.8%，今次就跌成4.2%。四隻股份中，IBM公佈業績後股價跌7%最甘。而最影響巴郡嘅係可口可樂，本周二公佈上季銷售意外下跌後，股價跌6%；巴郡持9.1%可口可樂股權，即係唔見10.4億美元。