【本報訊】梁振英踐踏基層市民的選舉權，中產人士也怒不可遏，憤而上街。「佢將人分成兩等，仲要宣之於口，真係無法無天！」陳女士昨隻身加入遊行譴責梁振英。她坦言丈夫月入遠高於1.4萬元，但不忿梁的言論，「我有良心，比佢得到5,000萬更有價值」。她認為每個人都生而平等，也應該受照顧，惟現行政策都偏幫有錢人，「租金又貴，羊毛出自羊身上，最終小商戶都只會成為利益輸送嘅犧牲品」。
「冇理由歧視窮人」
現年58歲的李先生是退休公務員，早前因母親過身無法到佔領區聲援，現喪事辦妥就每天都前來「佔鐘」。享有長俸的他坦言生活無憂，「但普選冇理由以錢去區分」。他曾支持梁振英參選特首，現在回想起來只感到被騙，「我覺佢只值1.4元」。
任職建築界的古先生月入超過1.4萬元，以前也曾是梁振英口中月入少於1.4萬元的低收入人士。他批評梁為小圈子選舉辯護，令人憤怒，「呢個世界個個都係由低做起，就算李嘉誠都係，梁振英冇理由歧視窮人，冇萬四蚊唔等於唔應該有政治權利」。他指很多大學畢業生收入也不足1.4萬元，「佢哋係社會中嘅菁英，唔通連呢班菁英都唔應該有政治權？唔合理」。