天有不測之風雲！第五場比賽期間天降豪雨，令到場地濕滑起嚟，但47歲老將巫斯義行走江湖多年見慣風雨，敵退我進之下，佢騎文廐「摯友無敵」異軍突起勇武鬥爭，激過後生仔，前置均速一錘定音，既為此駒開齋，亦助自己今季首勝谷草，二、三名分別係「翡翠寶寶」及「好勁寶」。當中「翡翠寶寶」又跑位置，轉倉後仲未識贏。阿巫早前幫文家良贏過「常勝龍王」同「歡樂小子」，文家良剛周日谷草重開即與潘頓合作贏「喜多盈」，呢晚靠阿巫以「摯友無敵」延續勝勢，保持馬房今季谷草未斷纜！
文家良賽後指出，今場「摰友無敵」降班跑，所遇對手不強，本來已有機會，賽前突然落大雨，令場地稍鬆軟，對其爭勝更有利，下仗回到三班角逐，對手會強一些，能否再捷要視乎進度。