大家都知唔係有錢就可以做到馬會會員，申請者需要分別獲得一位定居香港嘅馬會名譽董事、名譽遴選會員或遴選會員提名與附議，即係好似陳南祿、夏佳理等人，再經過面試先至可能做到，仲要畀12.5萬元入會費。但原來都有其他個別情況，股評人徐燦傑（Prof.J）近期就因為幫馬會喺某本雜誌寫文章，獲馬會提名做賽馬會員。
馬會現時大約有7,200名賽馬會員，唔少大把錢嘅強國人都好想成為馬會會員，作為身份象徵，做埋馬主贏到馬仔就更加威水，可惜做馬會會員真係唔易。
Prof.J就話，今次獲馬會提名做會員，只係無心插柳柳成蔭，事緣佢上月開始免費幫馬會喺某本財經雜誌寫文章，等多啲年輕人知道馬會做乜東東、裏面有乜嘢設施之類，佢都估唔到因此獲對方提名做會員，佢視之為一份小禮物。