【本報訊】自佔領運動在9月28日開始，香港最大型的民主運動已持續進行超過20日，大量學生及示威者佔領各個商業區，未有離開迹象。本報訪問不同零售業界代表，發現佔領行動對生意影響不一。有人高呼銷情大受打擊，生意劇減超過六成，正醞釀裁員潮；不過亦有企業指本土消費力強勁，「佔中」與否對銷情毫無影響，更有意繼續擴張兼增聘人手。
記者：鄭柏齡 周燕芬 林幗欣
佔中被指影響各行各業生意，但其實亦有商戶受惠。新地（016）旗下一田百貨行政總裁莊偉忠表示，10月1日至19日止，各分店生意額平均按年增長28.6%，「我哋睇到嘅情況係佔中對生意完全冇影響」。7間分店中，屯門店增長達42.6%，沙田、大埔等分店最少增長12%，僅旺角店生意額按年下跌。
莊偉忠指，旺角生意額減少屬意料之內，但「同佔中冇關係」；他解釋，該店去年10月正值剛開業，且距離示威區較遠，事實上旺角店銷情與9月份佔中前相若。不少商界代表炮轟佔中影響生意，莊偉忠認同：「一田生意好，唔能夠以偏概全話冇人受影響」，但質疑「點解冇經濟學家行出嚟，量化佔中對零售業嘅實際影響呢？」
「人工一定有得加」
同時，他對財政司司長曾俊華所指，佔中令信用卡簽賬大跌的說法有懷疑，「信用卡公司一般月底先報數，我自己都未報，點解咁快知有影響？人係識得走、識得行嘅，你要買尿片，旺角被人佔領，咪去油麻地買囉」。
事實上，以9月底開張的一田觀塘分店為例，莊偉忠透露開業頭25天內，已錄得逾千萬元生意額，達「老店」沙田分店超市生意額的八成，遠超公司預期，「觀塘店內地客只佔3%，反映本土消費非常強勁」。他補充，公司一向「希望做多啲香港人生意」，至9月底時內地客佔整體客人比例只有17.8%。
由於銷情理想，他提升第四季銷售增長預測至20%，「人工一定有得加，花紅一定有，我話嘅」！他原預期明年再開一間新店，「我自己話開5間都得，但同事做得太辛苦」，故決定暫停有關計劃。公司今年已聘請逾300人，9月時人手突破1,000人。
崇光生意已回復正常
位於銅鑼灣示威區中心的崇光百貨，佔中初期一度提早於晚上6點關店，市場擔心生意大受影響。不過，母企利福（1212）首席財務官潘福全則透露，初期生意確實「有少少影響」，近日主要路道重新開啟，生意已經回復正常，料「10月份生意跌幅唔會超過10%」。
對於有僱主指佔中或引發裁員，潘福全估計只屬個別情況，公司亦沒有計劃裁員，「Come on！有冇咁誇張，咪最多賺少啲」。他補充，尖沙嘴分店將在11月開業，近日已開始增聘及調配人手。
【市民意見】
要買嘅照買
李先生：「近日都有去行一田，每次大概使幾百蚊至1,000蚊，主要買食品同日常用品，佔中係會有少少影響生活，但係對於消費就冇影響，要買嘅照買，都要食飯㗎！」
冇乜改消費
何先生：「佔中期間，自己嘅消費模式冇乜特別改變，本身喺中環做飲食行業，雖然佔中頭幾日對生意係有啲影響，不過𠵱家已經恢復咗七成左右啦。」
