內房物業代理合富輝煌（733），股價沉喺一年底，限購令鬆綁，有機會大翻身。
合富喺祖國係領先一手同二手嘅物業代理，場內地產大孖沙包括保利、恒大（3333）等，都有合作夥伴關係。
又家陣除咗三、四個城市仍然受制限購令，其餘各大城市限購已經解封，加埋房貸鬆綁，祖國報載，喺十一長假頭三日，南京樓盤認購量，比去年同期增加近1倍！合富經歷咗今年上半年滲淡市況，食住內房同貨款放寬政策，谷底大翻身。
食住電貿潮有錢途
合富今年上半年純利倒退咗28%，到6,461萬元，EPS 0.127元，而場內專業評估，集團今年下半年EPS去到0.265元，比起上半年係一個double，反映合富下半年開始turnaround，而明年度專業評估EPS更上到0.46元，預測PE得5.4倍。場內另一家有內房代理嘅美聯（1200），明年PE講緊31倍，合富輝煌平咗一大截。
合富啱啱9月中宣佈，計劃引資搜房，呢個月尾，會EGM表決搜房認購事宜，一旦通過，有機會成為短打誘因。呢次協議配股價3蚊，合富現價（2.45元）仲係潛緊水。
又合富引資嘅搜房，家陣市值高達330億港元，係合富市值嘅25倍！而集團拍住超級大孖沙，整多條互聯網融資業務戰線，食住電貿嘅潮流，又有多條搵銀嘅財路。
又合富自家主打房王網，單係上半年，錄到4,000宗成交易，營業額近5,000萬元。諗到若果房王網順風順水，業務靚靚仔仔，一分拆出嚟，以搜房市值size睇，合富潛在增值，亦都肥仔。呢轉煲合富，當翻半番到3.7元，明年預測PE都係8倍，未有耐追到行家。
錢雋
細價股專家
本欄逢周二、三、五刊出